NRI च्या दृष्टीकोनातून..............

NRI च्या दृष्टीकोनातून..............


प्रवास केल्याने ज्ञानात भर पडते, हे काही खोटं नाही. नवे देश, नवी संस्कृती, नवीन लोकं सर्वच गोष्टी ज्ञानात भर घालतात. युरोप च्या टूर मधे बहूतेक सहप्रवासी NRI होते. बरचसे NRI हे अमेरीकन असतात हे वेगळं सांगायची गरज नाही. :) त्यांचे अनुभव , सल्ले ऎकण्याची संधी या सहलीत मिळाली.

पहील्याच दिवशी गाडीत सगळ्यांनी आप आपली ओळख करून दिली होती. ६०% प्रवासी हे रिटायर्ड पेन्शनर होते. प्रत्येकाची मुलं ही डॉक्टर किंवा इंजीनियर.......प्रथीतयश कंपन्यांमधे काम करणारी. ३० % लोकं ही ब्रिटन मधली डॉक्टर कपल्स होती. इग्लंड मधे एवढे भारतीय डॉक्टर आहेत याची मला अजिबात कल्पना नव्हती. आमचा टूर ओपरेटर तर सांगत होता की पूर्वी जवळ जवळ ९०% प्रवासी हे डॉक्टर असायचे. आणि त्यांना वाटायचं कि कोणत्यातरी मेडीकल कॉन्फरन्स साठी सगळ्यांना घेऊन निघाले आहेत कि काय......... बाकीचे १० टक्के आमच्यासारखे software engineer. डेप्यूटेशन वर आलेले. एकटे, नाही तर बायको बरोबर.

टूर बरोबर ४ दिवसात तीन देश फिरणं म्हणजे खरं तर एक marathon चं होती. तरीही प्रवासाच्या तिसऱ्या दिवशी संध्याकाळी जरा निवांत वेळ मिळाला आणि गप्पा सुरु झाल्या. आमच्या बरोबर दोन गुज्जु फॅमिली होत्या. या लोकांशी बरीच ओळख झाली होती. त्यातलाच एक पक्का गुज्जु businessman ओबामाला शिव्या घालत होता. तो पर्यंत मी सुद्धा ओबामाची एकच बाजू ऎकली किंवा वाचली होती ज्यात ओबामाची स्तुती आणि बुशला शिव्या घातल्या गेल्या होत्या. तर या गुज्जुच्या मते तो आणि त्याचा मित्र हे अमेरिकेच्या २% सर्वात श्रीमंत लोकांमधले होते. अमेरीकेत यांची हॉटेल्सची चेन होती.ओबामा बद्दल चे त्याचे विचार ऎकण्या सारखे आहेत । त्याच्या मते त्याच्या सारखी २% श्रीमंत लोकं संपूर्ण अमेरीकेच्या इन्कम टॅक्स मधली ७० % रक्कम भरतात आणि तो स्वतःच्या कष्टाच्या कमाईतली ५०% रक्कम सरकारला देत आहे. श्रीमंतांना लुटून काम न करण्याऱ्या, बसून खाणाऱ्या गरीबांमधे पैसे लुटण्याची ओबामाची पॉलिसी आहे आणि याच कारणामुळे तो जास्त लोकप्रिय आहे. त्याच्या मते अमेरीकेतील श्रीमंत लोकांवर ओबामाने अत्याचार सुरू केलाय. याच्या पेक्षा बुश हजार पटींनी चांगला होता. हा ओबामा काही वर्षात अमेरीकेची नक्कीच वाट लावणार असं ठाम पणे सांगत होता तो .

ते काहीही असू दे , अमेरीकेचा त्याला जाज्वल्य अभिमान होता.
या अभिमानाच्या (आणि पित असलेल्या विस्कीच्या) भरात भारत काय इग्लंडला पण नावं ठेवून झाली. त्याच्या "गाव"ची लोकं कशी चांगली आहेत, वर्ण,वंशद्वेष अजिबात नाही हे फार कौतूकाने सांगत होता. आम्हाला तर स्वतःचं कार्ड देवून आग्रहाचं निमंत्रण केलं. शिवाय आम्हा बॅचलरांना "फुकट"चा सल्ला सुद्धा दिला कि लंगड्या, लुळ्या, आंधळ्या कशाही असू दे; एका अमेरीकन पोरीशी लग्न करा आणि तिकडे या... घटस्फोट तो मिळवून देईल आणि आमची आख्खी लाईफ बनवेल! :) काही गुजराथी मुली सजेस्ट करेपर्यंत त्याची मजल गेली...... :) त्याची ही इंग्रजी तली बडबड ऎकण्यात खूप मजा आली आणि किवही आली त्याच्या विचारसरणीची......